Nuusflitse – Maart 2019 - Hierdie plaasprotokol geld tydens verkiesing

Hierdie plaasprotokol geld tydens verkiesing

Plaasprotokol is van toepassing om toegang tot plase tydens die nasionale verkiesing te reguleer. Dié protokol, wat in 2006 tussen Agri SA en die Onafhanklike Verkiesingskommissie (OVK) geteken en in 2014 hersien is, sal weer geld.

Volgens dr Jane Buys, Veiligheidsrisiko-analis van Vrystaat Landbou (VL), het VL en die OVK op 13 Maart 2019 ’n vergadering hieroor gehou. Die nasionale verkiesing vind op 8 Mei 2019 in Suid-Afrika plaas.

“Die protokol behels dat redelike toegang tot plase aan die OVK gebied word wat betref kiesersopleiding van amptenare en die vestiging van kieslokale,” sê sy.

Meer as 200 politieke partye is geregistreer vir vanjaar se nasionale verkiesing. Die partye kan nie vrye toegang wat betref werwing tot plase verkry nie. Volgens Buys meld die protokol ook dat landbouers werkers na dorpe sal neem waar hulle werwing van verskeie politieke partye kan bywoon.

“Plaastoegang moet nogsteeds geskied in lyn met Agri SA se protokol waar toestemming vanaf die landbouer bekom moet word om sy eiendom te betree,” sê Buys.