Swaar reën oor die noordelike dele van die Vrystaat

Geskep op 14 November 2016

Swaar reën oor die noordelike dele van die Vrystaat                             

                                                                                                                                                                                     

                                                                                    VERKLARING/PRESS RELEASE


Swaar reën oor die noordelike dele van die Vrystaat

Talle landbouers in die noordelike dele van die Vrystaat is vandag besig met skade opnames na swaar reën en hael oor die naweek sporadies voorgekom het. Reënmetings in die Parys distrik het tussen 30mm en 200mm binne vier ure Vrydagmiddag, 11 November 2016, gewissel. Kobus Dannhauser, voorsitter van die Parys Boerevereniging, sê sporadiese wolkbreuke het oor gebiede voorgekom; “Een boer het 30mm oor vier ure gemeet, ‘n ander 100mm oor dieselfde tydperk en nog ’n landbouer 200mm.” Die reën volg op sowat 250mm wat die vorige drie weke oor dele van die gebied geval het.

“Ten spyte van die skade is ons ongelooflik dankbaar! Die plaasdamme is almal vol, die Vaalrivier loop mooi en ons is dankbaar dat ons kan weet die Bloemhofdam kan nou aangevul word,” aldus Dannhauser. Sowat 80% van landbouers in die distrik was reeds klaar geplant, en veral sojaboon aanplantings het erge haelskade. Talle landerye het ook spoelskade en store se dakke het afgewaai of op implemente ineengestort.

Herman Weiss, voorsitter van Greenlands Boerevereniging naby Koppies, sê talle plaas- en werkershuise se dakke het ook in dié omgewing afgewaai of ingegee, terwyl ander huise oorstroom het. “Tussen 120mm en 150mm het binne sowat 20mm oor dele van die distrik uitgesak, en ons is baie dankbaar vir elke druppel.”

Landbouers het al begin aanplant, maar nie baie van hulle is reeds klaar geplant nie. Weiss sê stuks wild is deur die hael doodgeslaan of het verdrink. Skade in dié verband word nog nagegaan.

Intussen het sowat 60 stuks wild op Koos van Niekerk, ’n lid van Gottenburg Boerevereniging noord van Heilbron, se plaas gevrek. Van die diere is deur die hael doodgeslaan, en ander het verdrink. Van Niekerk sê tot 236mm het binne 24 uur in die omgewing geval. “Ons is ongelooflik dankbaar vir die reën.” Landbouers in die omgewing is tans besig met skade opnames na dakke ook hier afgewaai of ingeval het en aanplantings beskadig is.  

'n Video van die reën by Van Niekerk is hier beskikbaar.

In die Bothaville en Wesselsbron distrik is skade opnames ook onderweg, veral op koring aanplantings wat deur hael getref is. Tussen 60mm en 100mm is Vrydagmiddag in die omgewings gemeet, en hael het ook sporadies voorgekom.

Verder wes en in die westelike en suidelike dele van die Vrystaat het talle landbouers steeds geen noemenswaardige reën ontvang nie, dus het die droogte die landbouers steeds in sy greep.

Die Suid-Afrikaanse Weerdiens waarsku intussen dat nog swaar reën en lokale oorstromings die week in die noordelike dele van die Vrystaat moontlik is.

Vir meer inligting, kontak

Kobus Dannhauser by 082 892 2540

Herman Weiss by 082 952 0747

Koos van Niekerk by 082 448 7323

Tommie Esterhuyse, VL streekverteenwoordiger vir Parys, Koppies en Heilbron, by 082 782 0668

      

              Foto/Photo: Koos van Niekerk                                                                                                      Foto/Photo: Herman Weisse      

      

              Foto/Photo: Herman Weiss                                                                                                      Foto/Photo: Herman Weiss

        

           Foto/Photo: Koos van Niekerk                                                                                                                          Foto/Photo: Koos van Niekerk

     

             Foto/Photo: Jakkals le Roux (Wesselsbron)

 

 

                                                                                              Farmer’s Weekly, trotse media vennoot van VL