2018

Selfoon-toepassing se vele funksies verbeter veiligheid

11 Mei 2018

 

Meer akkurate statistieke, ’n vinniger reaksietyd ná bedreigings en die monitor van misdaad in jou omgewing.

Dit is van die funksies wat ’n nuwe veiligheidstoepassing, genaamd Die Plaaswag wat deur Vrystaat Landbou (VL) bekend gestel is, gebruikers kan bied.

Volgens Gerhard Kriel, Hoof Uitvoerende Beampte van VL, werk die toepassing of toep met ’n paniekknoppie en sal dit VL se lede, landbouers én die publiek help om veiligheid te verbeter.

Dit kan boonop ook eers vir ’n gratis proeftydperk van 30 dae afgelaai word. Die toep, waarvan VL ’n vennoot is, is deur ’n tegnologiemaatskappy Piri ontwikkel en kos slegs R24.99 per maand. Dit kan by die Google Play Store of die App Store afgelaai word.

“Dit het ook ten doel om akkurate misdaadstatistieke te versamel waarmee VL leiding kan neem in die bekamping van misdaad in die Vrystaat,” sê Kriel. Alle voorvalle wat daarop gelaai word, word aan VL deurgegee. Dr Jane Buys, Veiligheidsrisiko-analis van VL, analiseer weekliks die data om bedreigings te identifiseer.

Kriel sê die toepassing is egter nie net vir landbouers van waarde nie. Enige lid van die publiek kan dit aflaai en dit kan ook in stede en dorpe gebruik word.

“Die eenvoudigheid van die toep maak dat dit makliker gebruik kan word deur bestaande plaaswag-strukture. Dit kan reaksietyd ná bedreigings verlaag en veiligheid in die gemeenskap verbeter,” sê Rian Bothma van Piri.

Volgens Buys word die toep aan ’n beheerkamer gekoppel. Wanneer die paniekknoppie gedruk word, word boodskappe aan 25 gekose nommers vanaf die selfoon gestuur. Die selfoon bel ’n noodnommmer van die gebruiker se keuse en terselfdertyd skakel die beheerkamer ook vier gekose noodnommers.

Dit gee aan die betrokke mense ook die GPS koördinate van waar die persoon in nood is.

“Verder maak dit ook voorsiening vir die laai van misdaad-insidente op landbougrond en kan jy ook versoek om in ’n sekere radius, byvoorbeeld van 10-300km, al die ander misdade in jou omgewing waar te neem,” sê Buys.

Met die toep kan die gebruiker ook ’n selfoon deur die beheerkamer laat volg wanneer hy of sy op reis is.

 

Farmer’s Weekly, trotse mediavennoot van VL