VL vergesel LUR'e na hoë misdaadgebiede langs Lesotho-grens

Vrystaat Landbou (VL) doen 'n beroep op die LUR vir Gemeenskapsveiligheid, Paaie en Vervoer, asook die LUR vir Landbou, om vinnig op te tree ná hul besoek aan hoëmisdaadgebiede langs die Lesotho-grens tussen 10 en 12 September. Die besoek het dorpe soos Zastron, Vanstadensrus, Wepener, Hobhouse, Ladybrand, Clocolan, Ficksburg, Clarens, Fouriesburg en dele van QwaQwa gedek. VL het die LUR'e ingelig oor die uitdagings wat boerderygemeenskappe langs die grens in die gesig staar.

As deel van die besoek bevestig dr. Jane Buys, VL se veiligheidsrisiko-analis, dat inligtingsessies met geaffekteerde boerderygemeenskappe plaasgevind het oor die kwessies wat met oorgrensmisdaad verband hou. Hierdie uitdagings sluit in vee- en weidingdiefstal, brandstigting en die diefstal van trekkers, toerusting en soutlekke. Boonop word plaasprodukte, trekkers en koperkabels gesteel, terwyl besproeiingstelsels en voerbakke beskadig word. Onwettige kruisingsroetes wat deur Basotho-burgers gebruik word, dra verder by tot hoë misdaadvlakke.

Biosekuriteit en die oordrag van dieresiektes weens die gebrek aan heinings en kwarantynfasiliteite is ook bespreek. Die verhuring van grond en weiding aan Basotho-boere, sowel as die groot aantal Basotho-burgers wat onwettig in Suid-Afrika woon, is deur alle boerderygemeenskappe as dringende bekommernisse uitgelig. Dr. Buys het ook beklemtoon dat die gebrek aan selfoonontvangs 'n wesenlike kwessie vir boeregemeenskappe langs die grens is.

“Al hierdie uitdagings sal ingesluit word in 'n verslag wat kort- en mediumtermyn-aksieplanne vir konkrete ingryping deur nasionale departemente op provinsiale vlak uiteensit,” het Buys afgesluit.