Provinsiale Veiligheidsberaad behoort nie ’n papieroefening te wees nie, vra VL

Die Provinsiale Veiligheidsberaad wat op 28 en 29 Augustus 2024 deur die SAPD in Bloemfontein aangebied is, behoort nie net ’n papieroefening te wees nie, versoek Vrystaat Landbou (VL).

VL het saam met alle staatsdepartemente wat ’n belang by landbou het asook alle georganiseerde landbou-organisasies die beraad bygewoon. Beide die LUR van Gemeenskapsveiligheid, Paaie en Vervoer sowel as die LUR van Landbou en Omgewingsake was ook betrokke.

Jakkals le Roux, voorsitter van VL se Landelike Veiligheidskomitee, bevestig dat uitdagings wat deur die kernorganisasies en departemente geïdentifiseer is, in vyf kommissies bespreek is, waar konkrete voorstelle en aksiestappe gegee is oor hoe dit aangespreek moet word en deur watter departemente. Hy noem verder dat die volgende tekortkominge tydens die beraad geïdentifiseer is:

• Die effektiewe implementering van die Nasionale Landelike Veiligheidstrategie;

• Duidelik toegewysde werkslading van Landelike Veiligheid koördineerders;

• Die vestiging van reserviste as 'n magsvermenigvuldiger en landelike veiligheidseenhede

• Tekorte by Veediefstaleenhede; misdaadprobleme by die RSA/Lesotho-grens;

• Die gebrek en verandering van relevante wetgewing wat ontbreek, byvoorbeeld die Skutwet;

• Die regulering en gebrek aan beheer by meentgronde onder munisipale beheer.

Le Roux bevestig dat die SAPD en SANW reeds versoek is om kritieke tekortkominge na nasionale vlak te eskaleer, terwyl die LUR ook sekere aspekte op ministeriële vlak sal uitlig.

Le Roux het sy hoop uitgespreek dat die beraad nie net 'n papieroefening sal wees nie, maar dat praktiese implementering en aksiestappe sal lei tot 'n verbetering in landelike veiligheid van boerderygemeenskappe.