Beurtkrag saboteer voedselproduksie

Francois Wilken, president van Vrystaat Landbou (VL) het vandag gewaarsku dat die toename in beurtkrag voedselproduksie ondermyn. Volgens Wilken is die organisasie se lede ernstig bekommerd oor die impak van beurtkrag op boere se produksievermoë. “Die verskaffing van betroubare elektrisiteit is krities in elke faset van die landboubedryf. Vlak 6-beurtkrag veroorsaak egter dat landbou-aktiwiteite vir groot dele van die dag tot stilstand gebring word”, het Wilken gesê.   

Vrystaat Landbou glo swart bemagtigingswette, vakbonde en burokratiese beperkings is die rede vir die voortslepende krisis:

• Die ras-behepte “bemagtigingsbeleid” lei tot misbruik deur politieke elites binne staatsinstellings soos ESKOM. Dit het kundigheid en bekwame bestuur (van alle gemeenskappe) uit Eskom gedryf en daartoe gelei dat die ekonomie stelselmatig doodgewurg is. Nou word voedselproduksie deur politieke ideologie gesaboteer.
• Die invloed wat NUMSA in ESKOM sowel as die regering het, is nog 'n rede vir die kragkrisis. Dekades lank is die vakbonde gepaai tot nadeel van al die land se mense. Gerugte van sabotasie tydens die onlangse loongeskille met Eskom dui daarop dat NUMSA Suid-Afrika as gyselaar vir hul eie belange sal hou.
• Privaat kragtoevoerkapasiteit bestaan reeds. Dit is gereed om elektrisiteit in die kragnetwerk in te druk. In sommige gevalle is oplossings van die landbou ook reeds in plek gestel. Die implementering van hierdie opwekkingsvermoë word egter nie deur ESKOM se ideologies gedrewe en rasbehepte burokrasie toegelaat nie.

Die uitwerking van die kragkrisis op die land se vermoë om voldoende en bekostigbare voedsel te produseer en die impak daarvan op werkskepping is twee kritieke faktore wat Suid-Afrika nader aan 'n mespunt van anargie beweeg. Dit bedreig veel meer as net die landbou in Suid-Afrika.

Vrystaat Landbou doen vanmiddag 'n voorlegging aan NERSA in opposisie teen ESKOM se 32%-prysverhogingsversoek om vanaf 1 April 2023 te begin implementeer.